Senattıń Byudjet hám ekonomikalıq reformalar máseleleri boyınsha komiteti jámiyetshilikke esabat beredi.

Usı jıldıń ótken dáwiri mámlekettiń joqarı nızam shıǵarıwshı organı ushın júdá nátiyjeli boldı. Atap aytqanda, nızam shıǵarıwshılıq xızmeti sheńberinde Senat tárepinen ótken jılǵa salıstırǵanda 1,5 ese kóp másele kórip shıǵıldı.

Usı menen birge, iskerliktiń tiykarǵı ústin baǵdarı Ózbekstan Respublikası Prezidentiniń 2017-jıl 22-dekabrde Oliy Majlisqa jollanǵan Múrájaatnamasında belgilengen eń áhmiyetli wazıypalardı ámelge asırıw boldı. Usı maqsette Senattıń Háreketler baǵdarlaması hám aǵımdaǵı jılǵa arnalǵan jumıs rejesinde belgilengen ilajlardı orınlawǵa ayrıqsha itibar qaratıldı. Senattıń ayrıqsha wákilliklerin ámelge asırıwdan, baqlaw-tallaw jumısların alıp barıw, parlamenttiń tómen palatası menen óz-ara baylanıs ornatiwdan baslap, jámiyetlik xızmetke shekemgi barlıq baǵdarlarǵa ayrıqsha itibar berildi.

Atap aytqanda, parlament joqarǵı palatasınıń komitetleri bul baǵdarlarda ayrıqsha belsendilik kórsetti. Mısalı, Byudjet hám ekonomikalıq reformalar máseleleri boyınsha Senat komiteti aǵımdaǵı jıldıń ótken dáwirinde óz xızmetiniń tiykarǵı qánigelestirilgen baǵdarları boyınsha jumısların kúsheytti. Onıń birinshi yarım jıllıqtaǵı xızmetine hám aldaǵı ústin baǵdarlarına baǵıshlanǵan baspasóz konferenciyasında esabat dáwirinde 5 májilis ótkerilgeni hám olarda Komitet wákilliklerine tiyisli 18 másele kórip shıǵılǵanı atap ótilde. Olardıń ishinde byudjet, finans tarawları hám ekonomikalıq reformalarǵa tiyisli úsh nızam bar. Atap aytqanda, Komitet májilislerinde «Mámleketlik satıp alıwlar haqqında», «Ózbekstan Respublikası Sawda-sanaat palatası haqqında» (jańa redakciyada) hám basqa nızamlar kórip shıǵıldı.

Komitettiń baqlaw-tallaw xızmeti nızamlardıń, mámleketlik baǵdarlamalardıń hám basqa nızamshılıq hújjetleriniń mámleket kóleminde, sonday-aq, aymaqlar kesiminde orınlanıwın úyreniwge qaratıldı. Bir qatar baqlaw ilajları, seminarlar, dóńgelek stollar hám konferenciyalar ótkerildi. Atap aytqanda, Ózbekstan Respublikası Konstituciyasına muwapıq, Senattıń ayrıqsha wákilliklerin ámelge asırıw sheńberinde Ózbekstan Respublikası Oraylıq bankiniń 2017-jıldaǵı xızmeti haqqındaǵı esabatı hám Esap palatasınıń ótken jıldaǵı xızmeti haqqındaǵı esabatı tıńlandı. Sonday-aq, Ózbekstan Respublikası Jeke menshikke ótkerilgen kárxanalardı qollap-quwatlaw hám básekini rawajlandırıw mámleketlik komiteti baslıǵınıń «Birjalar hám birja xızmeti haqqında»ǵı Ózbekstan Respublikası Nızamınıń hám fond birjasın rawajlandırıwǵa baylanıslı baǵdarlamalardıń orınlanıw jaǵdayı haqqındaǵı esabatı hám basqa máseleler tıńlandı.

Esabat dáwirinde Komitet tárepinen ótkerilgen konferenciyalar hám seminarlar sheńberinde valyuta siyasatın liberallastırıw, salıq siyasatınıń zamanagóy baǵdarları, qımbatlı qaǵazlar bazarın rawajlandırıw keleshegi, cifrlı ekonomika jaǵdayında korporativ basqarıwdı rawajlandırıwdıń tiykarǵı tendenciyaları, bank-finans sektorınıń innovaciyalıq rawajlanıwınıń túrli tárepleri talqılandı. Sonday-aq, qabıl etilip atırǵan normativlik-huqıqıy hújjetlerdiń mazmunı hám áhmiyeti keńnen túsindirildi.

Komitet aǵzaları tárepinen fizikalıq hám yuridikalıq shaxslardıń 8 725 múrájaatı kórip shıǵıldı. Olarda kóterilgen máselelerdi sheshiw maqsetinde mámleketlik hákimiyat hám basqarıw organlarına senatorlardıń 40 múrájaatı jiberildi. Bunıń nátiyjesinde puqaralardı birneshe jıllar dawamında mazalap kelgen kóplegen mashqalalar sheshildi.

Mısalı, Komitetke Jizzax wálayatı Baxmal rayonı «Tońotar» máhálle puqaralar jıyını aymaǵındaǵı Qushtóbe hám Úray awıllarınıń turǵınlarınan jergilikli xalıqtıń, jámi shama menen 3,5 mıń adamnıń ishimlik suw menen jeterli dárejede támiyinlenbewi haqqında múrájaat kelip tústi. Bul múrájaat boyınsha Senat aǵzasınıń Ózbekstan Respublikası Ministrler Kabineti Baslıǵınıń birinshi orınbasarı A. Ramatovqa sorawı jiberildi. Senator sorawına berilgen juwapta xalıqtı suw menen támiyinlewdi jaqsılaw máselesi aǵımdaǵı jıl ushın aymaqlardı sociallıq-ekonomikalıq rawajlandırıwdıń mánzilli baǵdarlamasına kirgizilgeni atap ótilgen. Usılay etip, Komitet tárepinen kóterilgen másele Ózbekstan Respublikası Prezidentiniń 2018-jıl 4-maydaǵı «Jizzax wálayatı xalqın sapalı ishimlik suw menen támiyinlewdi jaqsılaw ilajları haqqında»ǵı qararında óz sheshimin taptı.

Sonday-aq, Komitet aǵzaları mámleket basshısı tárepinen ekonomikalıq reformalardı ámelge asırıw, aymaqlardı sociallıq-ekonomikalıq rawajlandırıw, finans-bank sistemasınıń turaqlılıǵın támiyinlew, isbilermenlik hám jeke biznesdi rawajlandırıw tarawlarında belgilengen wazıypalardıń orınlanıwı ústinen deputatlıq hám jámiyetlik baqlawdı ámelge asırıw boyınsha jumıs alıp barmaqta.

Jámi alǵanda, Senatta hám jergilikli orınlarda 3 500 puqara qabıl etildi. Olardıń ishinde Komitette turaqlı tiykarda isleytuǵın senatorlar tárepinen 79 puqara qabıl etildi.

Baspasóz konferenciyası dawamında Ózbekstan Respublikası Oliy Majlisi Senatınıń Byudjet hám ekonomikalıq reformalar máseleleri boyınsha komiteti aǵzaları jurnalistlerdi qızıqtırǵan barlıq sorawlarǵa tolıq juwap berdi.

Ózbekstan Respublikası
Oliy Majlisi Senatınıń
Xabar xızmeti

| 7 02.08.2018



×
Portal kartası