- Mámleketimizdegi "qızıl," "sarı" hám "jasıl" aymaqlardıń jańalanǵan dizimi járiyalandı 12
- Deputatlar tárepinen Ózbekstan Respublikası máhálle hám shańaraqtı qollap-quwatlaw ministri lawazımına talaban maqullandı 11
- Prezident Bektemir rayonı aktivleri menen ushırasıw ótkerdi. 11
- Mámleket basshıları sóylesiwlerdiń nátiyjelerinen qanaatlanǵanlıǵın bildirdi 10
- Ózbekstan Prezidenti BMSH Bas Assambleyasınıń 78-sessiyasında sózge shıqtı. 10
Yaponiya hám Koreya Respublikası menen eki tárepleme investiciyalıq hám sawda-ekonomikalıq birge islesiwdiń búgingi jaǵdayı hám onı rawajlandırıw perspektivaları dodalandı Ózbekstan Respublikası Prezidenti Shavkat Mirziyoev 24-fevral kúni Yaponiya hám Koreya Respublikası menen eki tárepleme investiciyalıq hám sawda-ekonomikalıq birge islesiwdiń búgingi jaǵdayı hám onı rawajlandırıw perspektivaların dodalawǵa baǵıshlanǵan májilis ótkerdi.
Atap ótiw kerek, bul eki mámleket tek Aziyada ǵana emes, al pútkil dúnyada, ásirese joqarı texnologiyalar tarawında aldınǵı qatarda turadı, sonday-aq keń investiciyalıq múmkinshiliklerge iye.
Siyasiy erik hám joqarı dárejede turaqlı dialog arqalı Ózbekstan menen bul mámleketler arasındaǵı qatnasıqlar strategiyalıq sheriklik dárejesine kóterildi, birgeliktegi xızmetlestiktiń túrli baǵdarlarında tıǵız baylanıslar jolǵa qoyıldı.
2019-jılı nátiyjeli saparlar ámelge asırılıp, eki tárepleme qatnasıqlar tariyxında jańa bet ashıldı. Atap aytqanda, 18–21-aprel kúnleri elimizge Koreya Respublikası Prezidenti Mun Chje In sapar menen keldi, al 17–20-dekabr kúnleri Ózbekstan Respublikası Prezidenti Shavkat Mirziyoyev Yaponiyada boldı. Ushırasıwlar hám sóylesiwler juwmaqları boyınsha húkimetler hám tarawlar arasındaǵı hújjetlerdiń salmaqlı paketi, sawda-ekonomikalıq hám investiciya tarawlarındaǵı kelisimler imzalandı.
Búgingi jıyında usı mámleketler menen ózara sawda hám investiciya kórsetkishleriniń izbe-iz ósip baratırǵanı atap ótilди. Ótken jıldıń juwmaqları boyınsha Ózbekstan menen Yaponiya arasındaǵı tovar ayırbaslaw kólemi 400 million dollardan astı. Búgingi kúnde respublikada Kún shıǵıw eli kapitalı qatnasındaǵı 30ǵa jaqın kárxana islep tur.
Kelisimlerdi óz waqtında hám sapalı ámelge asırıwǵa, investiciyalıq sheriklikti tereńlestiriw boyınsha jańa usınıslardı islep shıǵıwǵa ayrıqsha itibar qaratıldı.
Yaponiyalıq sherikler menen geologiya, ximiya hám neft-ximiya, bank-finans sektorı, densawlıqtı saqlaw hám bilimlendiriw sıyaqlı tarawlarda ulıwma qunı 6,6 milliard dollar bolǵan 48 joybar ámelge asırılıp atırǵanı atap ótilди.
Atap aytqanda, HIS kompaniyalar toparı menen miymanxana komplekslerin qurıw, Isuzu hám Itochu menen «SamAvto» QJ JShJniń óndiris quwatların keńeytiw, Yaponiya xalıqaralıq sheriklik agentligi (JICA) menen birgelikte Nawayı jıllılıq elektr stanciyasında (Nawayı-3) energobloklar qurıw joybarları hám basqa da kóp joybarlar tabıslı ámelge asırılmaqta.
Jıyın dawamında eki tárepleme túrli ilajlardı, sonıń ishinde eki mámlekettiń isbilermenlik wákilleriniń ózara saparların shólkemlestiriw hám jańa birgeliklesken joybarlardı islep shıǵıw arqalı Ózbekstan menen Yaponiya arasındaǵı sheriklikti jedellestiriw zárúrligi atap ótilди.
Koreya Respublikası menen ekonomikalıq sheriklik te sezilerli dárejede rawajlanıp barmaqta. Atap aytqanda, ótken jıldıń juwmaqları boyınsha eki tárepleme tovar ayırbaslaw kólemi 2018-jılǵa salıstırǵanda 27 procentke, sonıń ishinde eksport 30,1 procentke arttı. Tek ótken jıldıń ózinde Ózbekstanda Koreya kapitalı qatnasında 198 kárxana dúzildi, olardıń ulıwma sanı bolsa 800-den astı.
Koreyalı sherikler menen Tashkent qalasında balalar kóp tarmaqlı medicina orayın qurıw joybarı tabıslı ámelge asırılıp atırǵanı atap ótilди. Paytaxt wálayatınıń Qibray rayonında «Tashkent Farma Park» innovaciyalıq ilimiy-óndiris farmacevtikalıq klasterin shólkemlestiriw jumısları baslandı. Bul joybardı ámelge asırıw, atap aytqanda, ilimiy izertlew orayı, laboratoriya, vivariy, farmakopeya orayı bar Farmacevtikalıq texnika universitetin, sonday-aq dári-dármaqlar, medicina buyımları hám medicina texnikasın islep shıǵarıwǵa arnalǵan sanaat zonasın shólkemlestiriwdi názerde tutadı.
Sherikliktiń keleshegi bar baǵdarları retinde awıl xojalıǵı, informaciya-kommunikaciya texnologiyaları, densawlıqtı saqlaw, ximiya, jeńil, elektrotexnika, farmacevtika hám zergershilik sanaatı, bilimlendiriw hám innovaciyalar sıyaqlı tarawlar belgilendi.
Koreya xalıqaralıq sheriklik agentligi (KOICA) texnikalıq járdemi menen 2019-jılı densawlıqtı saqlaw hám standartlastırıw tarawlarında ulıwma qunı 13 million dollar bolǵan eki grant joybarı tamamlandı. Ulıwma qunı 29,6 million dollar bolǵan 6 joybar ámelge asırılıp atır. 2020–2022-jıllarda ulıwma qunı 72,2 million dollar bolǵan jáne 10 joybardı ámelge asırıw máseleleri islep shıǵılmaqta.
Koreya Respublikası Eksimbanki menen sheriklik sheńberinde Ózbekstan Respublikasındaǵı ústin investiciyalıq joybarlardı qarjılandırıw hám birgelikte qarjılandırıw ushın 2 milliard dollar muǵdarındaǵı qarjı resursları tartıldı hám strategiyalıq áhmiyetke iye 14 joybar ámelge asırıldı. Ulıwma qunı 608 million dollar bolǵan 6 joybardı ámelge asırıw baslandı.
Ulıwma alǵanda, Yaponiya hám Qubla Koreya menen birgeliktegi joybarlardı ámelge asırıw nátiyjesinde 40 mıńnan aslam jańa jumıs ornın jaratıw, óndiris kólemin 4,1 milliard dollarǵa, eksporttı bolsa 1,14 milliard dollarǵa arttırıw názerde tutılǵan.
Prezident Shavkat Mirziyoyev joqarı dárejedegi saparlar juwmaqları boyınsha islep shıǵılǵan «Jol kartaları»na muwapıq, 2020-jılǵa belgilengen ilajlardı tolıq hám sapalı ámelge asırıw zárúrligin atap ótti.
Jıyında dodalanǵan máseleler boyınsha tiyisli ministrlikler hám mákemeler basshılarınıń esabatları tıńlandı, anıq ilajlar hám wazıypalar belgilendi.