- Mámleketimizdegi "qızıl," "sarı" hám "jasıl" aymaqlardıń jańalanǵan dizimi járiyalandı 11
- Mámleket basshıları sóylesiwlerdiń nátiyjelerinen qanaatlanǵanlıǵın bildirdi 10
- Ózbekstan Prezidenti BMSH Bas Assambleyasınıń 78-sessiyasında sózge shıqtı. 10
- Deputatlar tárepinen Ózbekstan Respublikası máhálle hám shańaraqtı qollap-quwatlaw ministri lawazımına talaban maqullandı 10
- Prezident Bektemir rayonı aktivleri menen ushırasıw ótkerdi. 10
Húrmetli Forum qatnasıwshıları!
Sizlerdiń barlıǵıńızdı «Jaslar 2020: global birlik, turaqlı rawajlanıw hám insan huqıqları» temasındaǵı Samarqand insan huqıqları forumınıń qatnasıwshıların sálemlew men ushın úlken quwanısh. Sizlerdi Xalıqaralıq jaslar kúni menen shın júrekten qutlıqlayman.
Bul Forumdı ótkeriw baslamasın qollap-quwatlaǵanı ushın Birlesken Milletler Shólkeminiń Bas sekretarı Antoniu Guterreske ayrıqsha minnetdarlıq bildiremen.
Forum jumısına Birlesken Milletler Shólkeminiń, YUNESKO, Xalıqaralıq miynet shólkemi, Xalıqaralıq migraciya shólkemi, Parlamentler aralıq awqam, Yevropada qáwipsizlik hám birge islesiw shólkemi, Shanxay birge islesiw shólkemi, Ǵárezsiz Mámleketler Doslıǵı, Islam birge islesiw shólkemi hám basqa da sheriklerimiz wákilleri qatnasıp atırǵanı ushın olarǵa alǵıs bildiremen.
Áziz doslar!
Belgili bolǵanınday, keleshekke umtılǵan jaslar planetamızdaǵı turmıstı jáne de abadan hám gúllep-jasnaǵan etiwge baǵdarlanǵan jańa ideyalar hám dóretiwshilik sheshimlerdiń deregi bolıp esaplanadı.
BMTniń Jaslar strategiyasında «jaslar investiciya salıwǵa turatuǵın, júdá qımbatlı hám áhmiyetli resurs bolıp esaplanadı, sebebi olarǵa salınǵan investiciyalar ózin kóp márte aqlaydı», dep atap ótiledi. Men bul tiykarǵı qaǵıydaǵa tolıq qosılaman.
Usı jıldıń basınan berli COVID-19 pandemiyası menen baylanıslı jaǵday global kún tártibiniń oraylıq máselelerine aylandı. Jańa túrdegi koronavirustıń tarqalıwı pútkil dúnyada jiddiy ekonomikalıq hám sociallıq aqıbetlerge alıp keldi. Xalıq, ásirese jaslar, mámleketler hám xalıqaralıq jámiyetshilik tárepinen hár tárepleme juwap ilajların kóriwdi talap etetuǵın kóplegen mashqalalarǵa dus keldi.
Bunday sharayatta jaslardıń dawısınıń esitiliwi áhmiyetli. Olardıń aktual mútaajlıqların támiyinlew, huqıqları hám nızamlı máplerin qorǵawǵa baǵdarlanǵan milliy, aymaqlıq hám global strategiyalar menen baǵdarlamalardı islep shıǵıw hám ámelge asırıwda tikkeley qatnasıwına múmkinshilik jaratıw zárúr.
Búgingi quramalı jaǵdayda jaslardıń, sonıń ishinde pandemiya sınawlarına da ózleriniń keleshegi úmitli baslamaları hám sociallıq joybarları menen layıqlı juwap berip atırǵanı itibarǵa ılayıq. Pútkil dúnyada jas erikti járdemshiler xalıqtıń sociallıq jaqtan qorǵawǵa mútáj qatlamların qollap-quwatlaw, jańa ekonomikalıq hám gumanitarlıq baǵdarlamalardı ilgeriletiwge belsene qatnasıp atır.
Húrmetli Forum qatnasıwshıları!
Házirgi dúnyada intellektual hám ruwxıy jaqtan rawajlanǵan, baslamashıl jaslar turaqlı rawajlanıwdıń háreketlendiriwshi kúshine aylanıp barmaqta. Búgin Jańa Ózbekstannıń jas áwladı — mámleketti modernizaciyalawǵa baǵdarlanǵan tez hám keń kólemli reformalardıń háreketlendiriwshi kúshi hám belsendi qatnasıwshısı.
Xalqınıń yarımınan kóbiregin jaslar quraytuǵın Ózbekstanda olardıń huqıqların, erkinliklerin hám nızamlı máplerin támiyinlew mámleket siyasatınıń ústin baǵdarı bolıp esaplanadı.
Tek sońǵı jıllardıń ózinde jas áwladtı hár tárepleme qollap-quwatlaw hám garmoniyalı rawajlandırıw, hár bir jastıń jámiyette layıqlı orın iyelewi ushın bir qatar nızamlar, Prezident pármanları hám qararları, Húkimet qararları qabıl etildi.
Oliy Majlis palataları janında Jaslar parlamentleri dúzildi, Jaslar isleri agentligi hám Jaslar máseleleri boyınsha tarmaqlar aralıq keńes shólkemlestirildi.
Házirgi waqıtta «Ózbekstan jasları — 2025» koncepciyası islep shıǵılmaqta, jaslar menen islew nátiyjeliligin bahalawdıń birden-bir ólshemleri hám jaslar siyasatın bahalaw milliy indeksi engizilmekte.
Búgin insanıyat dus kelip atırǵan tınıshlıq hám qáwipsizlikke qáwipler, terrorizm hám ekstremizm, rasizm, klimat ózgerisi, sonday-aq COVID-19 pandemiyası sıyaqlı kóplegen mashqalalar olardı sheshiw ushın sáykeslestirilgen global háreketlerdi hám jaslardıń bul proceslerge belsene qatnasıwın talap etedi.
Usıǵan baylanıslı Ózbekstan tárepinen BMT Bas Assambleyasınıń 72-sessiyasında usınılǵan Jaslar huqıqları haqqındaǵı konvenciyanı qabıl etiw pútkil dúnyadaǵı eki milliardtan artıq jigit-qızdıń huqıqların támiyinlewde áhmiyetli orın tutadı. Sonıń menen birge, ol jas áwladtıń bilim alıwı, sociallıq qollap-quwatlanıwı, mápleriniń qorǵalıwı hám óz múmkinshiliklerin ámelge asırıwı ushın sharayat jaratıw maqsetinde kóp tárepleme birge islesiwdi keńeytiwge xızmet etedi. Bul baslama xalıqaralıq jámiyetshilik tárepinen keń qollap-quwatlanbaqta.
Isenemen, búgingi Forum qatnasıwshıları da bul baslamanı qollap-quwatlap, hújjet joybarın ózleriniń konstruktiv usınısları menen bayıtadı.
Búgin óz jumısın baslap atırǵan Samarqand jaslar forumı tınıshlıq hám gúllep-jasnaw jolında global birlik, turaqlı rawajlanıw hám insan huqıqların támiyinlewge jas áwladtıń jáne bir áhmiyetli ámeliy qádemi hám salmaqlı úlesi boladı, dep úmit etemen.
Forumdıń barlıq qatnasıwshılarına nátiyjeli jumıs tileymen.
Shavkat Mirziyoyev,
Ózbekstan Respublikası Prezidenti