Karantin talapların basqıshpa-basqısh jumsartıw ilajları belgilendi.

Prezident Shavkat Mirziyoyev aymaqlarda sanaattı rawajlandırıw máseleleri boyınsha videoselektor jıyının ótkerdi.

Ilaj basında mámleket basshısı koronavirus pandemiyası menen baylanıslı jaǵdayǵa toqtaldı. Atap aytqanda, sońǵı bir ay ishinde mámlekettiń barlıq aymaqlarında tósek orınları hám dem alıwdı qollap-quwatlaw apparatlarınıń sanı birneshe ese arttırılǵanı, emlew usılları jańartılǵanı hám tez medicinalıq járdem xızmetiniń jumısı kúsheytirilgeni atap ótilgen. Nátiyjede koronavirustan sawayıw kórsetkishi 59 procentten 77 procentke arttı. COVID-19 menen awırıǵanlar sanı 32 mıńnan asqanına qaramastan, 25 mıńnan aslam nawqas sawaydı, 7 mıń nawqas emleniwdi dawam ettirmekte.

— Ekonomikalıq hám sociallıq tarawlarınıń turaqlı jumısın támiyinlew, xalıqtıń turmıs sharayatın jeńillestiriw menen birge, puqaralarımızdıń densawlıǵı hám ómirin qorǵaw jolındaǵı gúresti bosastırmastan, karantin talapların basqıshpa-basqısh jumsartıwımız zárúr. Xalıqtıń ózi de bunı soramaqta, — dedi Prezident.

Usı jaǵdaydı esapqa alıp, 15-avgusttan baslap avtomobil transportı qurallarınıń háreketleniwine, jergilikli avia hám temir jol qatnasına sheklewsiz ruqsat beriw kerek ekeni kórsetildi. Sonday-aq, sanatoriyler, pansionatlar, miymanxanalar, muzeyler, balalardı salamatlastırıw lagerleri, sulıwlıq salonları, shash alıw orınları hám ashıq hawaǵa jaylasqan jámiyetlik awqatlanıw orınlarınıń xızmeti qayta tiklenedi. Shańaraq ilajların úyde, belgilengen talaplarǵa ámel etken halda, 30 adamnan aspaytuǵın qatnasıwshılar menen ótkeriw múmkin boladı.

17-avgusttan baslap aymaqlar arasında avtomobil transportı háreketin, jámiyetlik transport jumısın (metropolitennen tısqarı), sonıń ishinde qala shetine qatnaytuǵın avtobuslardı qayta júrgiziw rejelestirilmekte.

20-avgusttan baslap kiyim-kenshek hám qurılıs materialları bazarları, iri dúkanlar, sport zalları, fitnes-klublar hám basseynler jumıs islewi múmkin ekeni atap ótilди.

Respublikalıq komissiya aldına hár bir xızmet túri boyınsha sanitariya talapları sheńberinde jumıs islewdiń anıq qaǵıydaların belgilew wazıypası qoyıldı. Epidemiologiyalıq jaǵdayı turaqlı mámleketlerden kelgen adamlardı karantinge jaylastırıw hám karantinnen ótiw tártiplerin ápiwayılastırıw, pnevmoniya menen awırıp, keyin sawayǵan nawqaslar ushın reabilitaciya orayların ashıw tapsırıldı.

Sanitariya-epidemiologiya xızmetine jámiyetlik immunitettiń qáliplesiw procesin baqlaw maqsetinde antitelolardı úzliksiz tekseriw sistemasın jolǵa qoyıw zárúrligi kórsetildi.

Mádeniy-aǵartıwshılıq hám kóńil ashıwǵa arnalǵan televideniye hám radio baǵdarlamaların kóbeytiw, sociallıq aralıqtı saqlaǵan halda spektakller, filmler, koncertler hám basqa ilajlardı kórsetiwdi shólkemlestiriw zárúrligine ayrıqsha itibar qaratıldı.

— Karantin talapları jumsartılǵanına qaramastan, hámmeimiz sociallıq aralıqtı saqlaw, betperde taǵıw, dezinfekciya hám basqa sanitariya-gigiyena qaǵıydalarına ámel etiwimiz, aldın jol qoyılǵan qátelerdi qaytalamawımız kerek. Bir Allaǵa shúk ir, hámmeimiz az emes tájiriybe topladıq. Kóp nárseni basınan ótkerген xalqımız úlken mártlik hám qaharmanlıq, joqarı medicinalıq mádeniyat kórsetpekte. Temir tártipke ámel etip, tabanlılıq hám sabır menen bul sınawlardı, álbette, jeńip shıǵamız. Men buǵan нық isenemen, — dep atap ótti Prezident.

| 9 12.08.2020



×
Portal kartası