Ózbekstan Respublikasınıń «Mámleketlik satıp alıwlar haqqında»ǵı Nızamın ámelge asırıw ilajları haqqında.

Ózbekstan Respublikası Prezidentiniń qararı.

Qaraqalpaq tilinde

Ózbekstan Respublikasınıń «Mámleketlik satıp alıwlar haqqında»ǵı Nızamın ámelge asırıw ilajları haqqında

Ózbekstan Respublikasınıń «Mámleketlik satıp alıwlar haqqında»ǵı Nızamınıń nátiyjeli orınlanıwın, mámleketlik buyırtpashılardıń jumısınıń úzliksizligin támiyinlew, sonday-aq, mámleketlik satıp alıwlardı ámelge asırıw tártiplerin tártipke salıwdı jetilistiriw maqsetinde:

1. Ózbekstan Respublikasınıń «Mámleketlik satıp alıwlar haqqında»ǵı Nızamınıń ámel etiw kúshi tómendegi mámleketlik satıp alıwlarǵa qollanılmaytuǵınlıǵı maǵlıwmat ushın qabıl etilsin:

  • Ózbekstan Respublikası Prezidenti tárepinen tastıyıqlanatuǵın dizimge muwapıq mámleketlik satıp alıwlardıń strategiyalıq subyektleri tárepinen ámelge asırılatuǵın satıp alıwlar, mámleketlik rawajlanıw baǵdarlamaların, Ózbekstan Respublikası Prezidentiniń pármanları, qararları hám biyliklerinde, Ózbekstan Respublikası Húkimetiniń qararlarında názerde tutılǵan joybarlardı ámelge asırıw waqtında tovarlar, jumıslar hám xızmetlerdi satıp alıw bundan tısqarı;

  • mámleket qorǵawındaǵı adamlardıń qáwipsizligin, Ózbekstan Respublikasınıń qorǵanıw qábiletin, qáwipsizligin hám ishki tártipti támiyinlew, sonday-aq, mámleket sırlarına baylanıslı satıp alıwlar;

  • tótenше jaǵdaylarda Ózbekstan Respublikasınıń mútájliklerin támiyinlew ushın zárúr bolǵan tovarlar (jumıslar, xızmetler);

  • donor mámleketlerdiń, tiyisli xalıqaralıq, shet el húkimetlik hám húkimetlik emes shólkemleriniń tártipleri yamasa Ózbekstan Respublikası kepilligi astındaǵı shet el kreditleri hám shet el grantların beriw shártleri menen tovarlar (jumıslar, xızmetler) satıp alıwdıń basqa tártipleri belgilengen jaǵdaylarda;

  • Ózbekstan Respublikası Prezidentin saylawǵa, Ózbekstan Respublikası Oliy Majlisine, wálayatlıq, rayonlıq hám qalalıq xalıq deputatları Keńeslerine saylawlarǵa, sonday-aq, Ózbekstan Respublikası referendumların tayarlaw hám ótkeriw ushın ámelge asırılatuǵın satıp alıwlar;

  • sud májilislerinde qatnasıw ushın advokat (wákil) tayınlaw menen baylanıslı satıp alıwlar;

  • nızamshılıqqa muwapıq bahaları qatań belgilengən tovarlar (jumıslar, xızmetler).

2. Tovarlar (jumıslar, xızmetler) boyınsha mámleketlik satıp alıwlar tómendegishe ámelge asırılıwı belgilensin:

a) satıp alıw komissiyaları tárepinen bahalanatuǵın eń jaqsı usınıslardı tańlaw jolı menen:

  • mámleket qorǵawındaǵı adamlardıń qáwipsizligin, Ózbekstan Respublikasınıń qorǵanıw qábiletin, qáwipsizligin hám ishki tártipti támiyinlew, sonday-aq, mámleket sırlarına baylanıslı jaǵdaylarda;

  • Ózbekstan Respublikası Prezidentin saylawdı, Ózbekstan Respublikası Oliy Majlisine, wálayatlıq, rayonlıq hám qalalıq xalıq deputatları Keńeslerine saylawlardı, sonday-aq, Ózbekstan Respublikası referendumların tayarlaw hám ótkeriw ushın Ózbekstan Respublikası Oraylıq saylaw komissiyası tárepinen mámleketlik satıp alıwlar tarawındaǵı wákillikli organ menen kelisilgen halda tastıyıqlanatuǵın dizimler boyınsha;

b) tuwrıdan-tuwrı shártnamalar tiykarında:

  • tótenше jaǵdaylardı saplastırıw maqsetinde Ózbekstan Respublikasınıń mútájliklerin támiyinlew ushın Ózbekstan Respublikası Tótenше jaǵdaylar ministrligi tárepinen mámleketlik satıp alıwlar tarawındaǵı wákillikli organ menen kelisilgen halda tastıyıqlanatuǵın dizimler boyınsha;

  • tovarlar (jumıslar, xızmetler) boyınsha mámleketlik satıp alıwlar sud májilislerinde qatnasıw ushın advokat (wákil) tayınlaw menen baylanıslı bolsa;

  • tovarlar (jumıslar, xızmetler) ushın nızamshılıqqa muwapıq qatań belgilengən bahalar ornatılǵan bolsa.

3. Ózbekstan Respublikası Prezidenti janındaǵı Joybarlardı basqarıw milliy agentligi, Esap palatası hám Finans ministrliginiń mámleketlik buyırtpashılar tárepinen qosımshaǵa muwapıq dizimdegi tovarlar (jumıslar, xızmetler)di tuwrıdan-tuwrı shártnamalar tiykarında satıp alıw, shártnama dúzilgen kúnnen baslap úsh kúnnen keshiktirmey olar haqqındaǵı maǵlıwmatlardı mámleketlik satıp alıwlardıń arnawlı informaciyalıq portalına jaylastırıw tártiplerin belgilew haqqındaǵı usınıslarına kelisilsin.

4. Mámleketlik buyırtpashılar tárepinen mámleketlik satıp alıwlardıń arnawlı informaciyalıq portalında tómendegiler jaylastırılıwı belgilensin:

  • baslanǵısh bahasını tómenletiw boyınsha aukcion ótkeriliwi haqqındaǵı xabarlama — aukcion ótkeriliwinen keminde bes kún aldın;

  • konkurs ótkeriliwi haqqındaǵı xabarlama — konkurs qatnasıwshılarınan usınıslardı qabıl etiw múddeti tamamlanıwınan keminde on kún aldın.

5. Ózbekstan Respublikası Ádillik ministrligi hám Finans ministrligi Ózbekstan Respublikası Prezidenti janındaǵı Joybarlardı basqarıw milliy agentligi hám basqa da máplerli ministrlikler hám mekemeler menen birgelikte mámleketlik satıp alıwlar tarawında nızamdı qollanıw ámeliyatın turaqlı túrde talqılap barsın, mámleketlik satıp alıwlardıń sapalı hám úzliksiz ámelge asırılıwına tosıq bolatuǵın mashqalalardı anıqlasın hám olardı saplastırıw ilajların kórsin.

6. Ózbekstan Respublikası Prezidenti janındaǵı Joybarlardı basqarıw milliy agentligine:

  • Ózbekstan Respublikası Informaciyalıq texnologiyalar hám kommunikaciyalardı rawajlandırıw ministrligi menen birgelikte bir hápte múddetinde mámleketlik satıp alıwlardıń sapalı hám úzliksiz ámelge asırılıwın támiyinlew, mámleketlik buyırtpashılar ushın qolaylı sharayatlar jaratıw, nızamdı qollanıw ámeliyatındaǵı, sonıń ishinde jergilikli dárejedegi kemshiliklerdi saplastırıw maqsetinde mámleketlik satıp alıwlardıń arnawlı informaciyalıq portalınıń funkcionallıǵın jetilistiriw ilajların kóriw;

  • mámleketlik buyırtpashılar xızmetkerleriniń qatnasıwında mámleketlik satıp alıwlar tarawında seminar-treningler, sheberlik sabaqları hám basqa da oqıw ilajların ótkeriw;

  • eki ay múddetinde Ózbekstan Respublikası Prezidenti janındaǵı Qáwipsizlik keńesi apparatı, Mámleketlik qáwipsizlik xızmeti hám basqa da máplerli ministrlikler hám mekemeler menen birgelikte mámleket qorǵawındaǵı adamlardıń qáwipsizligin, Ózbekstan Respublikasınıń qorǵanıw qábiletin, qáwipsizligin hám ishki tártipti támiyinlew ushın zárúr bolǵan, sonday-aq, mámleket sırlarına baylanıslı tovarlar (jumıslar, xızmetler) dizimlerin tastıyıqlaw haqqındaǵı normativ-huqıqıy hújjet joybarınıń kiritiliwin támiyinlew;

  • eki ay múddetinde usı qarardıń talapların, sonday-aq, nızamdı qollanıw ámeliyatında júzege kelip atırǵan mashqalalardı esapqa alǵan halda, Ózbekstan Respublikasınıń «Mámleketlik satıp alıwlar haqqında»ǵı Nızamına ózgerisler hám qosımshalar kiritiw haqqındaǵı Nızam joybarın tayarlaw hám belgilengen tártipte kiritiw;

  • bir ay múddetinde satıp alıw komissiyalarınıń xızmetin shólkemlestiriw hám eń jaqsı usınıslardı tańlaw tártipleri haqqındaǵı qaǵıydanı islep shıǵıw hám belgilengen tártipte tastıyıqlaw wazıypaları júklensin.

7. Ózbekstan Respublikası Esap palatası Ózbekstan Respublikası Prezidenti janındaǵı Joybarlardı basqarıw milliy agentligi menen birgelikte usı qarardıń 2 hám 3-bántlerine muwapıq satıp alınatuǵın tovarlar (jumıslar, xızmetler) bahalarınıń qáliplesiwi ústinen qadaǵalawdı támiyinlesin.

8. Ministrlikler hám mekemeler bir ay múddetinde ózleri qabıl etken normativ-huqıqıy hújjetlerdi usı qararǵa sáykeslestirsin.

9. Usı qarardıń orınlanıwın qadaǵalaw Ózbekstan Respublikası Ministrler Kabinetiniń Baslıǵı A.N. Aripov, Ózbekstan Respublikası Prezidenti janındaǵı Qáwipsizlik keńesiniń xatkeri V.V. Mahmudov hám Ózbekstan Respublikası Esap palatasınıń baslıǵı M.M. Ikramov zimmesine júklensin.

Ózbekstan Respublikası Prezidenti
Sh. MIRZIYOYEV

Tashkent qalası, 2018-jıl 27-sentyabr.

| 6 26.09.2018



×
Portal kartası