Ózbekstan Respublikası Prezidenti Shavkat Mirziyoyevdiń Dushanbe qalasındaǵıǵı Ǵárezsiz Mámleketler Doslıǵına aǵza mámleketler basshıları Keńesiniń májilisindegi sózi

Ózbekstan Respublikası Prezidentiniń qutlıqlawı

Ózbekstan Respublikası Prezidenti Shavkat Mirziyoyevtiń Dushanbe qalasında bolıp ótken Ǵárezsiz Mámleketler Doslıǵına aǵza mámleketler basshıları Keńesiniń májilisindegi sózi

Húrmetli Emomali Sharipovich!

Húrmetli delegaciyalar basshıları!

Ushırasıwımızdıń barlıq qatnasıwshıların shın júrekten sálemlewge hám Tájikstan Respublikası Prezidenti, húrmetli Emomali Sharipovich Rahmonǵa dástúrge aynalǵan jılı miyman doslıǵı hám usı májilisti joqarı dárejede shólkemlestirgeni ushın minnetdarlıq bildiriwge ruqsat etiń.

Tájikstanlı doslarımız MDHǵa basshılıq etken dáwirde birlespemiz sheńberinde kóp tárepleme birge islesiwdi keńeytiw boyınsha nátiyjeli jumıslar alıp barǵanın ayrıqsha atap ótpekshimen.

Húrmetli hámkásipler!

Dúnyada júz berip atırǵan jıldam ózgerisler, global mashqalalar hám qáwip-qáterlerdiń kúsheyiwi jaǵdayında Ǵárezsiz Mámleketler Doslıǵı kóp qırlı birge islesiwdi bekkemlew ushın áhmiyetli platforma retinde óziniń zárúrligin tastıyıqlamaqta.

Ótken jıl elimizdiń MDH sheńberindegi iskerliginde túpten jańa basqıshtıń baslanıwı bolǵanın ayrıqsha atap ótiwdi áhmiyetli dep esaplayman.

Ózbekstan ekonomika, energetika, ilim hám innovaciyalar, jınayatshılıqqa qarsı gúres sıyaqlı tarawlardı qamtıytuǵın tarawlıq birge islesiw organlarınıń 10 nan aslamına qosıldı.

Shólkemimizdiń gezektegi sammitin 2020-jılı Ózbekstanda ótkeriwge tayar ekenimizdi tastıyıqlaymız.

Húrmetli delegaciyalar basshıları!

Kóp tárepleme birge islesiwimizdiń eń áhmiyetli hám keleshegi úlken baǵdarlarına toqtalıp ótiwdi qáleymen.

Birinshiden. Jáhán ekonomikasındaǵı quramalı procesler, «sawda urıslarınıń» kúsheyiwi hám protekcionizmdiń artıwı sharayatında MDH erkin sawda aymaǵınıń tolıq islesiwi hám óz-ara bazarlardı qáliplestiriw tiykarǵı máselelerge aylanıwı kerek.

Tek usı jıldıń basınan berli Ózbekstannıń Doslıqtaǵı kóp mámleketler menen sawda kólemi sezilerli dárejede arttı.

Óz-ara tawar ayırbaslaw kóleminiń joqarı ósiw pátlerin támiyinlew ushın bajxana tártiplerin múmkin bolǵanınsha ápiwayılastırıw, sawdadaǵı barlıq bar bolǵan istisnalar hám sheklewlerdi, sonıń ishinde texnikalıq tosıqlardı saplastırıw zárúr dep esaplaymız.

Doslıq aymaǵında xızmetlerdi erkin sawdalaw zonasın tezirek dúziwdi áhmiyetli dep bilemiz.

Ekinshiden. Ózbekstan mashinasazlıq, energetika, elektrotexnika, toqımashılıq, farmacevtika sanaatı hám awıl xojalıǵı tarawlarında kooperaciyanı jáne de kúsheytiw tárepdarı.

Biz Doslıqtıń barlıq mámleketleri menen bunday birge islesiwdi belsendi rawajlandırıp atırmız.

Birgeliktegi joybarlardı qollap-quwatlawdıń jańa mexanizmlerin qáliplestiriw maqsetinde Ózbekstanda MDH Finans-bank forumın ótkeriwge tayarmız.

Úshinshiden. Xalıqaralıq hám aymaqlıq transport koridorlarınan nátiyjeli paydalanıwǵa qaratılǵan jumıslarımızdı dawam ettiriw áhmiyetli. Bunda tarif jeńilliklerin óz-ara usınıwdıń birden-bir mexanizmin engiziw, talaplardı bir izge salıw, transporttıń barlıq túrlerinde júk tasıw waqtındaǵı túrli tosıqlardı saplastırıw hám logistikalıq oraylardı rawajlandırıw zárúr.

Tórtinshiden. Bizdiń pikirimizshe, awıl xojalıǵı tarawındaǵı nátiyjeli birge islesiw ónimlerdi óz-ara jetkerip beriwde «jasıl koridorlardı» keń engiziwge járdem beredi.

Agrosanaat kompleksi máseleleri boyınsha Keńes hám MDHniń awıl xojalıǵı tarawındaǵı basqa da dúzilmeleriniń iskerligin jedellestiriw zárúr dep esaplaymız.

Besinshiden. Doslıq mámleketlerinde aqparat-kommunikaciya texnologiyalarınıń roli artıp baratırǵanın esapqa alıp, MDH sheńberinde uzaq múddetli keleshekke mólsherlengen cifrlı ekonomikanı rawajlandırıw baǵdarlamasınıń islep shıǵılıwı hám qabıl etiliwin qollap-quwatlaymız.

Sanaat hám awıl xojalıǵı tarawlarında, finans sektorında aldınǵı cifrlı texnologiyalardı engiziw boyınsha joybarlardı mámleketlik-jeke sheriklik tiykarında birgelikte ilgeriletiwimiz, sonday-aq xalqımız hám isbilermenlik subyektleriniń qolay elektron xızmetlerden paydalanıw múmkinshiliklerin keńeytiwimiz múmkin.

Altınshıdan. Aymaqlar aralıq hám shegara boyı birge islesiwdi keńeytiw áhmiyetli baǵdar bolıp esaplanadı.

2020-jılı Ózbekstanda MDH aymaqları forumın ótkeriwdi usınamız.

Jetinshiden. Fashizm ústinen qolǵa kiritilgen ulıwma Jeńisimizdiń 75 jıllıǵın keń túrde bayramlaw boyınsha birgeliktegi ilajlardı ámelge asırıwǵa ústinlik beremiz.

Bul másele Ózbekstannıń 2020-jılı MDHǵa basshılıq etiwi koncepciyasında ayrıqsha sáwlelendirilеди.

Segizinshiden. Mámleketlerimizdiń turaqlı rawajlanıwınıń tiykarǵı shárti qáwipsizlikti támiyinlew hám júzege kelip atırǵan qáwip-qáterlerge óz waqtında juwap qaytarıwdan ibarat.

Aǵza mámleketlerdiń kópshiligi ushın Aǵanstanda dawam etip atırǵan qurallı qaqtığıs ulıwma qáwip bolıp qalmaqta.

MDH Aǵanstan mashqalasın múmkin bolǵanınsha tezirek siyasiy jol menen sheshiwge qaratılǵan xalıqaralıq háreketlerde áhmiyetli rol atqara aladı.

Xalıqaralıq terrorizm qáwipiniń artıp baratırǵanı jiddiy qáweter tuwdırmaqta.

Házirgi zaman terrorlıq dúzilmeleri úlken finanslıq resurslarǵa, eń jańa aqparat hám texnikalıq qurallarga iye bolıp, joqarı háreketshenlik hám operativlik penen ajıralıp turadı.

Bunıń menen birge, olardıń Jaqın Shıǵıstan Aǵanstanǵa, MDH shegaralarına qaray jıljıwı tendenciyası kúsheyip barmaqta.

Mámleketlerimiz terrorizm qáwpin óz waqtında hám nátiyjeli qaytarıw ushın, eń aldı menen aldın alıwǵa qaratılǵan kelisilgen háreketlerge tayar bolıwı kerek.

MDH aymaǵında qáwipsizlikke júzege kelip atırǵan qáwip-qáterlerdiń aldın alıw maqsetinde huqıq qorǵaw organlarımız hám arnawlı xızmetlerimiz iskerligin muwapıqlastırıwdı kúsheytiw, ámeldegi mexanizmler sheńberinde analitikalıq hám operativlik maǵlıwmatlardı turaqlı túrde almastırıw boyınsha nátiyjeli birge islesiwdi támiyinlew áhmiyetli dep esaplaymız.

Jaslar arasındaǵı radikallasıw mashqalası itibarımız orayında bolıwı kerek. Usıǵan baylanıslı bilimlendiriw, maǵrifat, jas áwladtı sociallıq qollap-quwatlaw, onıń huqıqları hám máplerin qorǵaw, ózin ózi júzege shıǵarıwı ushın sharayat jaratıw tarawlarındaǵı birge islesiwdi keńeytiw zárúr.

Ózbekstan MDHǵa aǵza mámleketler Jaslar isleri boyınsha Keńesine qosıladı hám onıń jumısında belsendi qatnasıwdı maqset etken.

Toǵızınshıdan. Mádeniy-gumanitarlıq baylanıslar hám ruwxıy qádiriyatlar Doslıq mámleketlerin birlestiriwshi áhmiyetli kúsh bolıp kelgen.

Usı sebepli mámleketlerimizde gezek penen hár jılı turistik kórgizbeler hám MDH Mádeniyat kúnlerin ótkeriwdi, Doslıq jas dóretiwshileriniń turaqlı ushırasıwların shólkemlestiriwdi, hár bir ilajdı belgili bir temaǵa baǵıshlawdı, sonday-aq MDH mámleketleriniń mádeniy miyrasınıń Virtual muzeyin jaratıwdı usınamız.

Húrmetli ushırasıw qatnasıwshıları!

Sózimniń aqırında túrkmenstanlı doslarımızdı Doslıqqa basshılıqtı qabıl etip alıwı menen qutlıqlawǵa hám оlarǵa úlken tabıslar tilewge ruqsat etiń.

Húrmetli Emomali Sharipovich Rahmonǵa samimiy qabıl etkeni hám sammitimizdi joqarı dárejede shólkemlestirgeni ushın jáne bir márte minnetdarlıq bildiremen.

Itibarıńız ushın raxmet.

| 6 29.09.2018



×
Portal kartası