Isbilermenlikti qorǵaw tarawında qanday mashqalalar bar?

2018-jıl 2-oktyabr kúni Oliy Majlis Nızamshılıq palatasınıń Sanaat, qurılıs hám sawda máseleleri komiteti Sawda-sanaat palatası menen birgelikte «Isbilermenlerdiń huqıqların qorǵaw, investiciya ortalıǵın hám iskerlik klimatın jaqsılaw, Ózbekstanda isbilermenlikti rawajlandırıwdıń áhmiyetli máseleleri» atamasında konferenciya ótkerdi.

Isbilermenlikti qorǵaw tarawında qanday mashqalalar bar?

Ilajǵa deputatlar, Ministrler Kabinetiniń juwapker wákilleri, Sawda-sanaat palatası, komitetler hám mákemeler wákilleri, ekspertler, ilimpazlar hám ǵalaba xabar qurallarınıń xabarshıları qatnastı.

Atap ótilgenindey, búgingi kúnde tiykarǵı itibar 2017–2021-jıllarda Ózbekstan Respublikasın rawajlandırıwdıń bes baslı baǵdarı boyınsha Háreketler strategiyasında belgilengen wazıypalardı ámelge asırıwǵa, mámleket penen biznes jámiyetshiligi arasında nátiyjeli dialog hám salamat sheriklik mexanizmlerin támiyinlewge, jeke múlk hám isbilermenlik subyektleriniń huqıqları menen nızamlı máplerin qorǵaw kepilliklerin kúsheytiwge qaratılmaqta.

Sonday-aq, biznes ortalıǵın jetilistiriw máseleleri boyınsha isbilermenlerdi aktual maǵlıwmatlar menen turaqlı támiyinlew, isbilermenlik iskerligin qollap-quwatlawǵa qaratılǵan ilajlardıń ámeliy nátiyjeliligin arttırıw, xalıqqa óz biznesin shólkemlestiriw hám alıp barıwda hár tárepleme járdem beriw, sonday-aq, isbilermenlik subyektlerine sapalı mámleketlik xızmetler kórsetiliwin támiyinlew áhmiyetli esaplanadı.

Sońǵı eki jıl dawamında elimizde kishi biznes hám jeke isbilermenlikti jedel rawajlandırıw, jeke múlkti qorǵaw hám onıń qol qatılmaslıǵı kepillikleriniń huqıqıy mexanizmlerin jáne de bekkemlew, bul tarawdaǵı byurokratiyalıq tosıqlardı saplastırıw, sonday-aq, investiciya ortalıǵı hám iskerlik klimatın jaqsılaw boyınsha túpkilikli reformalar ámelge asırılmaqta. Bul jumıslardıń nátiyjeleri tek xalıq hám mámleket turmısında ǵana emes, al reyting agentlikleri hám jetekshi xalıqaralıq finanslıq shólkemlerdiń bahalarında da sáwlelenbekte. Атап айтқанда, Dúńya bankiniń «Doing Business – 2018» esabatında Ózbekstan isbilermenler ushın qolaylı sharayat jaratıw boyınsha reformalar ámelge asırıp atırǵan aldınǵı on mámleket qatarınan orın aldı. Bul joqarıdaǵı pikirlerdi tastıyıqlaydı.

Álbette, bunday nátiyjeler óz-ózinen qolǵa kiritilgen joq. Konferenciya qatnasıwshıları ayrıqsha atap ótkendey, mámleketti rawajlandırıw hám xalıq abadanlıǵın támiyinlewdiń tiykarǵı jollarınıń biri isbilermenlikti jáne de rawajlandırıw, ápiwayı puqaralarǵa biznes alıp barıwdı úyretiw hám investiciya klimatın jaqsılaw menen baylanıslı. Bul maqsette Ózbekstan Respublikası Prezidentiniń bir qatar pármanları hám qararları qabıl etilip, olardıń tiykarında áhmiyetli ilajlar ámelge asırılmaqta. Mámleket tárepinen isbilermenlik subyektlerine bir qatar jeńillikler hám qolaylıqlar berilmekte, olardıń iskerligi hár tárepleme qollap-quwatlanbaqta.

Ózbekstan Respublikasınıń «Sawda-sanaat palatası haqqında»ǵı Nızamınıń jańa redakciyada qabıl etiliwi de keleshekte isbilermenlerdiń baslamaların ámelge asırıw ushın tiyisli sharayatlar jaratıw, biznes jámiyetshiligi menen húkimet, basqarıw organları hám basqa shólkemler arasında óz ara paydalı sheriklikti rawajlandırıw, isbilermenlik subyektleriniń nızamlı huqıqların qorǵaw kepilliklerin kúsheytiw, iskerlik klimatı hám investiciya ortalıǵın jaqsılawǵa hár tárepleme járdem beriw, sonday-aq, isbilermenlik subyektleriniń sırtqı ekonomikalıq iskerligin qollap-quwatlaw ushın huqıqıy tiykar bolıp xızmet etedi.

Ásirese, bul tarawdaǵı áhmiyetli jańalıqlardıń biri mámleket Prezidentiniń 2018-jıl 29-iyundaǵı Pármanı menen Salıq siyasatın jetilistiriw koncepciyasınıń tastıyıqlanıwı boldı. Koncepciyaǵa muwapıq, 2019-jıl 1-yanvardan baslap barlıq jeke shaxslardıń dáramatlarına salınatuǵın salıqtıń birden-bir stavkası 12 procent etip belgilenedi. Bul summanıń 0,1 procenti puqaralardıń jeke jámǵarılıp barılatuǵın pensiya esap betlerine baǵdarlanadı. Bunnan tısqarı, puqaralardıń sociallıq tólemleri biykar etiledi. Biznes ushın birden-bir sociallıq tólem stavkası 15 procentten 12 procentke túsiriledi. Yuridikalıq shaxslardıń aylanbasınan (túsiminen) mámleketlik maqsetli fondlarǵa májbúriy ajıratpalar biykar etiledi. Yuridikalıq shaxslardıń payda salıǵı stavkası 14 procentten 12 procentke tómenletiledi.

Analitiklerdiń pikirinshe, qabıl etilgen ilajlar Ózbekstanda isbilermenlikti jáne de rawajlandırıw, iskerlik hám investiciya klimatın jaqsılaw, isbilermenlerdiń huqıqların qorǵaw ushın keń múmkinshilikler jaratadı.

Konferenciya dawamında erisilgen jetiskenlikler menen birge, bul tarawda ele de sheshimin kútip atırǵan bir qatar mashqalalar hám kemshilikler de talqılandı. Bul mashqalalardı saplastırıw boyınsha qánigelerdiń, ekspertlerdiń hám isbilermenlerdiń pikirleri tıńlandı.

Konferenciya juwmaǵı boyınsha tiyisli usınıslar hám pikirlerdi óz ishine alǵan usınıslar islep shıǵıldı.

| 6 02.10.2018



×
Portal kartası