Senatta Milliy insan huqıqları institutlarınıń Global alyansı delegaciyası menen ushırasıw

2018-jıl 2-oktyabr kúni Senatta Oliy Majlis Senatı Baslıǵınıń orınbasarı S. Artikova menen Milliy insan huqıqları institutlarınıń Global alyansı (GANHRI) delegaciyası arasında Oliy Majlistiń Adam huqıqları boyınsha Wákiliniń múmkinshiliklerin úyreniw maqsetinde ushırasıw bolıp ótti.

Ushırasıw dawamında delegaciya aǵzalarına bes ústin baǵdar boyınsha Háreketler strategiyasın ámelge asırıw hám nızam jaratıw, nızamlardı qollanıw ámeliyatı, sonday-aq, aǵartıwshılıq xızmet tarawlarında parlamentlik qadaǵalawdı ámelge asırıw mısalında Oliy Majlistiń Adam huqıqları boyınsha Wákiliniń puqaralardıń huqıqları hám erkinliklerin qorǵawdaǵı roli haqqında maǵlıwmat berildi.

GANHRI wákilleri Ózbekstandaǵı Ombudsman institutınıń ózgesheligin atap ótip, onıń múmkinshiliklerin arttırıw hám Oraylıq Aziyanıń basqa mámleketleri ushın úlgi retinde insan huqıqların qorǵaw tarawındaǵı xızmetin dawam ettiriw zárúrligin atap ótti.

Belgili bolǵanınday, GANHRI — Shveycariyada yuridikalıq shaxs sıpatında dizimnen ótken xalıqaralıq коммерциялық emes shólkem. 2016-jılǵa shekem ol Adam huqıqları boyınsha milliy mekemelerdiń Xalıqaralıq úylestiriwshi komiteti dep atalǵan. Bul komitet 1993-jılı Tunis qalasında BMT qamqorlıǵında ótkerilgen xalıqaralıq konferenciya juwmaqları boyınsha dúzilgen.

GANHRI akkreditaciyası hám aǵzalığı BMT hújjetlerine muwapıq, milliy insan huqıqların qorǵaw mekemesi (MIQQM) xızmetiniń xalıqaralıq dárejede tán alınıwı forması bolıp esaplanadı.

Alyanstıń maqseti — milliy insan huqıqların qorǵaw mekemeleriniń BMT Adam huqıqları boyınsha Joqarı komissarınıń Basqarması menen birge islesiwin bekkemlew, olardıń BMTniń Parij principlerine sáykesligin bahalaw, sonday-aq, Adam huqıqları boyınsha Keńes hám BMTniń shártnamalıq organlarınıń ilajları menen májilislerine qatnasıwına járdem beriwden ibarat.

Ushırasıw juwmaǵında GANHRI delegaciyası Oliy Majlistiń Adam huqıqları boyınsha Wákili xızmetine hár tárepleme qollap-quwatlaw kórsetiwge tayar ekenin bildirdi.

Ózbekstan Respublikası
Oliy Majlisi Senatınıń
Xabar xızmeti

| 6 02.10.2018



×
Portal kartası