Banklerdi transformaciyalaw strategiyası hám procesi dodalandı

Bank aktivlerinde jeke menshik sektordıń úlesin 15 procentten 60 procentke jetkeriw boyınsha wazıypalar belgilendi Ózbekstan Respublikası Prezidenti Shavkat Mirziyoev 6-iyul kúni bank sistemasın reformalawdıń 2020-2025-jıllarǵa mólsherlengen strategiyasın ámelge asırıw hám kommerciyalıq banklerdi transformaciyalaw processlerin jedellestiriw máseleleri boyınsha májilis ótkerdi.

Jıyın dawamında belgilengen maqsetlerge erisiw ushın bir qatar áhmiyetli máselelerdi sheshiw zárúrligi atap ótilди.

Eń aldı menen, banklerdi transformaciyalaw procesin jedellestiriw zárúrligi aytıldı.

Házirgi waqıtta 6 kommersiyalıq bank — «Ipotekabank», «Sanoatqurılıshbank», «Turonbank», «Asakabank», «Aloqabank» hám «Agrobank» finanslıq diagnostika ótkeriw, uzaq múddetli strategiyalardı islep shıǵıw hám jeke menshikke ótkiziw máseleleri boyınsha xalıqaralıq finans institutları menen birgelikte isley basladı. Biraq basqa kommersiyalıq banklerdi transformaciyalaw jumısları jeterli dárejede belsendi alıp barılmay atırǵanı mámleket basshısı tárepinen atap ótilди.

Jaǵdaydı ózgertiw maqsetinde banklerge tán bolmaǵan funkciyalardı inventarlastırıw, banklerdi transformaciyalaw wazıypaların túsindiriw ushın Oraylıq bank janındaǵı Korporativ qayta tayarlaw orayında oqıw baǵdarlamaların shólkemlestiriw, eń aldı menen, jergilikli bank xızmetkerlerin bul baǵdarlamalarǵa tartıw tapsırıldı. Bul wazıypalar Oraylıq bankke júklendi.

Jıyında banklerdiń kredit portfeli hám joybarlarınıń sapasın arttırıw máseleleri de talqılandı. Stress-test nátiyjelerine qaray, mashqalalı kreditler úlesi bir neshe ese artıwı múmkin ekeni, bul bolsa bank sisteması ushın jiddiy sınaw bolatuǵını atap ótilди.

Usıǵan baylanıslı mashqalalı kreditlerdi aymaqlar kesiminde talqılaw hám kredit portfelleriniń sapasın saqlap qalıw ushın nátiyjeli mexanizm jaratıw boyınsha tapsırmalar berildi. Banklerdiń kredit portfelleri inventarizaciyadan ótkerilgennen keyin, Oraylıq bank qıyın jaǵdayǵa túsip qalǵan hár bir klienttiń finanslıq múmkinshiliklerin tiklew boyınsha anıq ilajlar islep shıǵıwı zárúrligi ayrıqsha atap ótilди.

Jıyında bank tarawındaǵı korrupciyanı túpkilikli saplastırıw zárúrligi de bólek másele retinde kórip shıǵıldı.

Mámleket basshısı bankler baslıqları korrupciyanı saplastırıw, komplayens-baqlaw sistemasın engiziw hám basqa da nátiyjeli mexanizmlerdi jolǵa qoyıw boyınsha qatań ilajlar kóriwi zárúrligin atap ótti.

Mámleket úlesi bar kommersiyalıq banklerde húkimet tárepinen ajıratılǵan qarjılar úlesiniń ele de joqarı ekenligi sınǵa alındı.

Atap aytqanda, bunday kreditlerdiń úlesi «Qishloq qurilish bank»te 41 procentti, «Ipoteka-bank»te bolsa 32 procentti quraydı. Ótken jılı mámleket kepilligi astında shama menen 600 million dollar muǵdarında kredit liniyaları tartılǵan bolsa, usı jılı bul kórsetkish 570 million dollarǵa jetedi. Sonıń menen birge, iri banklerde xalıqtıń jıynaq pulı hám múddetli amanatlarınıń úlesi ortasha esapta tek 5 procentti quraydı. Usı jaǵdaydı esapqa alıp, Oraylıq bankke xalıqtıń amanatların banklerge tartıw boyınsha qosımsha usınıslar tayarlaw tapsırıldı.

Mámleket basshısı kommersiyalıq bankler mámleket járdemisiz finanslıq resurslardı óz betinshe tartıwı zárúrligin atap ótti.

Jıyında talqılanǵan máseleler boyınsha Oraylıq bank hám kommersiyalıq bankler basshıları maǵlıwmat berdi.

| 8 06.07.2020



×
Portal kartası