Ózbekstan Sawda-sanaat palatası hám Hindstan sanaat konfederaciyası negizinde Ózbekstan-Hindstan isbilermenler keńesi dúzilmekte.

Ózbekstan menen Hindstan arasındaǵı sawda-ekonomikalıq hám investiciyalıq sheriklik milliy ekonomikanıń túrli tarawlarında turaqlı rawajlanıp atır. Eki mámleket kárxanaları arasında dári-dármek ónimlerin hám ximiyalıq ónimlerdi islep shıǵarıw, teri shiyki zatın qayta islew, sonday-aq, turizm hám medicina xızmetlerin kórsetiw boyınsha birgeliktegi joybarlar ámelge asırılmaqta.

Nyu-Delhi qalasında Ózbekstan Respublikası Prezidentiniń Hindstan Respublikasına mámleketlik saparı aldınan Ózbekstan Respublikası Investiciyalar boyınsha mámleketlik komiteti, Ózbekstan Sawda-sanaat palatası, Ózbekstannıń Hindstandaǵı elshiligi hám Hindstan sanaat konfederaciyası tárepinen shólkemlestirilgen Ózbekstan-Hindstan biznes-forumı tabıslı juwmaqlanıp, óz jumısın juwladı.

Ilajda Ózbekstan tárepine Ózbekstan Respublikası Ministrler Kabineti Baslıǵınıń orınbasarı, Investiciyalar boyınsha mámleketlik komitetiniń baslıǵı Suxrob Xolmuradov, Hindstan tárepine bolsa Hindstan Respublikasınıń sawda hám sanaat ministri Suresh Prabhu basshılıq etti.

Ózbekstan delegaciyası quramında ministrlikler hám vedomstvolar basshıları, Tashkent qalası, Tashkent, Samarqand, Buxara, Ándijan hám Sırdárya wálayatları hákimlikleriniń wákilleri, sanaat birlespeleri hám xoldingler wákilleri boldı. Hindstan tárepinen iri sanaat kárxanaları, kishi hám orta biznes tarawlarınıń 150 den artıq wákili qatnastı.

Forum sheńberinde Ózbekstan hám Hindstannıń sawda-ekonomikalıq hám investiciyalıq potencialı boyınsha prezentaciyalar ótkerildi. Qurılıs materialların islep shıǵarıw, turizm, medicina hám farmacevtika tarawlarında birgelikte ámelge asırıw rejelestirilgen keleshegi bar joybarlar usınıldı.

Ilaj dawamında Ózbekstan Sawda-sanaat palatası hám Hindstan sanaat konfederaciyası tárepinen Ózbekstan-Hindstan isbilermenler keńesin dúziw haqqında kelisimge qol qoyıldı.

Ózbekstan Sawda-sanaat palatasınıń baslıǵı A. Ikramov óz sózinde dúzilip atırǵan Isbilermenler keńesi jumısınıń ústin baǵdarları eki mámlekettiń isbilermenlik wákilleri arasında tuwrıdan-tuwrı baylanıslardı ornatıwǵa járdem beriw, eki tárepleme sanaat kooperaciyasın jáne de rawajlandırıwdı qollap-quwatlaw, sonday-aq, Ózbekstan hám Hindstan kárxanaları arasındaǵı sheriklikti rawajlandırıw ushın qolaylı sharayatlar jaratıw boyınsha usınıslar hám usınıs-pikirler islep shıǵıwdan ibarat ekenligin atap ótti.

Forum sheńberinde eki mámlekettiń isbilermenlik wákilleri arasında sóylesiwler de ótkerildi. Onda respublikanıń informaciyalıq texnologiyalardı islep shıǵıw, miymanxana biznesi, turizm, medicina hám densawlıqtı saqlaw, sonday-aq, azıq-awqat, toqımashılıq hám elektrotexnika sanaatı tarawlarında xızmet alıp baratuǵın kishi hám jeke biznes wákilleri qatnastı.

2018-jıl 28–29-sentyabr kú nleri Ózbekstan Respublikası Sırtqı sawda ministrligi, «Ózeksponoraz» Milliy kórgizbe kompaniyası hám Ózbekstan Sawda-sanaat palatası tárepinen Nyu-Delhi qalasında «Ózbekstanda islep shıǵarılǵan» milliy ónimler kórgizbesi shólkemlestirildi. Kórgizbeniń maqseti milliy ónimlerdi Hindstan bazarına ilgeriletiw, sonday-aq, respublikanıń ilimiy-islep shıǵarıw potencialın tanıstırıw edi.

Kórgizbede avtomobil jasaw hám mashinasazlıq tarawları, elektrotexnika, neft-ximiyalıq hám farmacevtika sanaatı, taw-kán tarawı hám qurılıs materialları islep shıǵarıw tarawları kórsetildi. Sonday-aq, Ózbekstannıń agrar tarawı hám azıq-awqat sanaatı, toqımashılıq, teri hám ayaq kiyim sanaatı, xalıq ámeliy óneri hám turizm baǵdarları da tanıstırıldı.

Hindstandaǵı potenciallı sherikler hám tutınıwshılarǵa jańa hám qurıtılǵan miywe-sabzavot, palız ónimleri, vino hám spirtli ishimlikler, azıq-awqat ónimleri, paxta hám trikotaj gezlemeler hám buyımlar, teri hám galantereya ónimleri, aǵash hám keramika buyımları, mineral tóginler, ximiyalıq talshıqlar hám ósimliklerdi qorǵaw quralları, sonday-aq, qara metall prokatı usınıldı.

Ilajlar juwmaǵında ulıwma bahası 95 million AQSH dollarınan artıq bolǵan 30 eksport shártnamasın, sonday-aq, bahası 3 milliard AQSH dollarına teń 50 den artıq investiciyalıq joybardı ámelge asırıw boyınsha kelisimlerge erisildi.

Atap ótiw kerek, búgingi kúnde Ózbekstanda Hindstan kapitalı qatnasındaǵı 145 kárxana bar. Tashkent penen Delhi hám Amritsar qalaları arasında háwa qatnası jolǵa qoyılǵan. 2017-jılı Ózbekstanǵa Hindstannan 10 mıńnan artıq turist kelgen. Hindstan aymaǵında qurıwshılarınıń biri «Óztreyd» AK bolǵan Ózbekstan-Hindstan sawda úyi xızmet kórsetpekte.

Derekkóz: Ózbekstan Respublikası Sawda-sanaat palatası.

| 8 03.10.2018



×
Portal kartası