"Ólik normalar" shıǵarıp taslandı

Parlamenttiń tómengi palatasınıń 2020-jıl 3-fevralda bolıp ótken gezektegi májilisinde xalıq wákilleri tárepinen bir qatar áhmiyetli máseleler kórip shıǵıldı. Olardan biri "Ózbekstan Respublikasınıń ayırım nızam hújjetlerine ózgerisler kirgiziw haqqında"ǵı nızam joybarı bolıp esaplanadı.

Jıyında atap ótilgenindey, «Mámleketlik emes kommerciyalıq emes shólkemler iskerliginiń kepillikleri haqqında»ǵı Nızamınıń 14-statyasında, «Sociallıq sheriklik haqqında»ǵı Nızamınıń 21-statyasında jámiyetlik áhmiyetke iye joybarlardı ámelge asırıw ushın mámleketlik sociallıq buyırtpa beriw hám jámiyetlik keńes quramın qáliplestiriw tártipleri názerde tutılǵan.

Biraq bul nızamlar qabıl etilgeninen keyingi ótken dáwirde mámleketlik basqarıw organları tárepinen sociallıq hám jámiyetlik áhmiyetke iye joybarlardı ámelge asırıw ushın sociallıq buyırtpa ajıratıw ámeliyatı baqlanbaǵan. Nátiyjede mámleketlik basqarıw organları janında sociallıq áhmiyetke iye joybarlardı kórip shıǵıw, ulıwmalastırıw hám bahalaw menen shuǵıllanıwı kerek bolǵan jámiyetlik keńesler ámelde jumıs alıp barmadı.

Usıǵan baylanıslı deputatlar mámleketlik sociallıq buyırtpa beriw tártiplerin ápiwayılastırıwdı usındı.

Olardıń pikirinshe, bul nızam joybarınıń qabıl etiliwi mámleketlik sociallıq buyırtpanı ajıratıw tártiplerin jetilistiriwge, sonday-aq mámleketlik basqarıw organları janında uqsas hám bir-birin tákirarlaytuǵın wazıypalar menen funkciyalardı atqaratuǵın jámiyetlik keńeslerdi dúziwdi názerde tutatuǵın normalardı biykar etiwge alıp keledi.

Bul tarawda artıqsha byurokratiyanıń aldın alıw, mámleketlik emes kommerciyalıq emes shólkemler iskerliginiń mámleketlik hákimiyat hám basqarıw organlarınan ǵárezsizligin támiyinlew zárúrligi atap ótilди.

| 6 04.02.2020



×
Portal kartası