Кутубхоналарда китоб алмашиш бурчакларини ташкил этиш масаласини кўриб чиқиш тўғрисида

Жамоавий мурожаат матни:

Бугунги кунда ёшларнинг китоб ўқишга бўлган қизиқишини ошириш, шунингдек, уларнинг бўш вақтини мазмунли ўтказиши учун қулай шарт-шароитлар яратиш муҳим аҳамиятга эга. Кутубхоналарда турли мавзулардаги китоблар мавжуд бўлса-да, айрим фуқаролар ўзлари ўқиб бўлган китобларини бошқа китобхонлар билан алмашишга қизиқиши мумкин.
Кутубхоналарда махсус китоб алмашиш бурчакларининг ташкил этилиши фуқароларга ўзлари ўқиб бўлган китобларни бошқа китобхонлар учун қолдириш ва уларнинг ўрнига бошқа китобларни олиш имконини беради. Бу ёшларнинг китобхонликка бўлган қизиқишини оширишга, шунингдек, китоблардан қайта фойдаланишга ёрдам бериши мумкин.
Шу муносабат билан Ўзбекистон Республикаси Таълим ва илм-фан вазирлигига давлат кутубхоналарида фуқаролар ўртасида китоб алмашиш бурчакларини ташкил этиш бўйича чоралар кўриш ҳамда уларнинг фаолият юритиш тартибини ишлаб чиқиш масаласини кўриб чиқишни таклиф этамиз.

Жамоавий мурожаат / ғоя ни амалга ошириш:

Мазкур таклифни амалга ошириш учун давлат кутубхоналарида китоб алмашиш бурчакларини ташкил этишнинг намунавий тартибини ишлаб чиқиш мақсадга мувофиқ.
Ушбу тартибда китобларни жойлаштириш учун махсус жойлар ажратиш, фуқароларнинг ўзлари ўқиб бўлган китобларни ихтиёрий равишда қолдириши ва уларнинг ўрнига бошқа китобларни олиши имкониятини яратиш, шунингдек, китоб алмашиш жараёнини кутубхона ходимлари томонидан мувофиқлаштириш масалаларини назарда тутиш мумкин.
Мазкур ташаббус ёшлар ўртасида китобхонлик маданиятини ривожлантириш, китоблардан янада самарали фойдаланиш ҳамда фуқароларнинг ўзаро билим алмашиши учун қўшимча имкониятлар яратишга хизмат қилиши мумкин.

20.11.2026



×
Портал харитаси